Ab sirf Kalpana ban kar reh gayi hai vo Kalpana,
Karnal mein janmi, vo kalpanao ki Kalpana.
Meri kavita ki har pankati ki prerna hai vo Kalpana,
Jeevan ke kisi pehlu ko jhinjhod gayi vo Kalpana.
Sapno ko dekha, aur sakaar kiya usne,
Apne desh ko vishwa mein, ek naya mukaam diya jisne,
Dekha karti thi vo syaamal nabh mein taaron ka sundar sansaar,
Chhoona chahti thi apne khwabon ko ja kar kshitij paar,
Sachi lagan se, kadi mehnat se, bachpan se hi tha use pyaar.
Yahi tamanna thi ke jana hai, bas Jana hai, taaron ke us paar,
Kalpana ki kalpana ka Coloumbia mein hua swapan sakaar,
Chhoo liya usne apne sapno ka vo pyaara sa sansaar.
Par niyati ko shayad kuch aur hi tha intezaar,
Usi nabh mein, usi kshitij mein taro ke jhurmut mein,
sadaa ke liye samaa gya, Kalpana ka sansaar.
Khud ko vileen kar usi nabh mein vo bhi tara ban gyi,
Is jameen ki laakhon kalpanao ki vo prerna ka sahara ban gayi.
Pucho apne aap se, jhaanko apne antarman mein,
Shayad tum mein bhi chhupi ho, us jaisi hi koi kalpana.
Sakaar karo, sakaar karo us Kalpana ki vo adhoori kalpana.
By:Anju Sharma
(International Public School Kurali)
